مملكهـ جود

السلام عليكم ورحمهـ اللهـ وبركاتهـ

هذي القصهـ على اجزاء وهي 4 اجزاء واللي يقراها يقولي اجيب باقي الاجزاء

ونتترككم مع القصه

الجزء الاول :
تعريف بابطال القصه

( جود بنت محمد الهارفي ) بنت عايله من اغنى العوايل الكويتيه الكل كان يفتخر فيها ، وكانت محط انظار الكل ، والكل يشهر على اخلاقها وجمالها ، جود عمرها 20 سنه طالبة بكلية الهندسة ، تتميز يجمالها العربي الاصيل ، العيون السود الواسعه ، شفايفها صغار ورديه ، خشمها حد السيف وصغير ، خدودها متورده دايم كونها خجوله مع الناس ، الشعر الاسود الطويل لين اخر ظهرها ، مدرج وناعم ، والقوام المشدود ، وفوق هذا كله الله وهبها صوت مخملي يسحر اللي يكلمها ولون برونزي يشبه رمل البحر بعز الشمس ، كانت حلوة بمعنى الكلمه ، و كانت ذكية ومثقفه ومن احسن بنات الكلية .

أم فهد الهارفي إهيا ام جود عندها من العيال غير جود : فهد ، شهد ، رغد ،، تحب زوجها لحد الموت ، وحاطته بعيونها ومستحيل تعصي له امر ، وربه بيت من الدرجه الاولى وعارفه شلون تحفظ بيتها وعيالها.

رغد البكر 25 سنة متزوجه ومسافرة مع زوجها (مبارك) إيرلنـدا لانه يدرس طب اسنان ، وبين فترة وفتره تزور اهلها ، كانت مملوحه شعرها مموج ، بشرتها بيضه ، ملامحها حاده وحلوة كانت تشبه ابوها وايد ، طبعا يوم تزوجت ماتت بجي ليش بتفارق اهلها وبتعيش بره فتره مو قصيره ، كانت اكثر خواتها حساسيه وتتأثر بسرعه.

فهد 23 سنه إطفائي ، حنطاوي طويل ، جسمه رياضي ، قوامه معتدل ، بنات العايلة يسمونه توم كروز الهارفي
كانو البنات لا شافوه يتمنون قربه ، بس كان ثقيل وما يعطي ويه ، ضحكته تسحر البنات ، والشباب يتمنون نص جماله ، كان جماله عربي واذا غــّتر يصير جنان يعني صعب تقارنونه بأحد وفوق هذا كله كان خلوق .

شهد وبالاحرى شهوده كانت دلوعه بن الهارفي لانها الصغيره بالبيت بنت الـ 17 سنه طالبه بالثنويه ، عيونها كبيرة ، بنيه غامجه ، شعرها قصير ناعم وحلجها صغير،دلوعه وحلوة ، شطورة بالمدرسه ، ومدرساتها يحبونها لانها حبوبه وجريئه وعندها اسلوب بالحجي .

ابو فهد الهارفي ( محمد ) اهو الاكبر بين اخوانه ، ومعروف بتربيته السنعه حق عياله ، والكل شاهد له ، ام فهد تصير بنت عمه كان يحبها بدون ما تدري وتقدم لها وتزوجو ويابو العيال .
********************************

أم فهد : شهد .. شهده .. روحي شوفي جود وينها فيه ؟
شهد : يما تلاقينها تدرس بالحديقه ، هذي ام قليب اربع وعشرين ساعه تدرس لا تحاتينها .
ام فهد : ويه حسبي الله عليج لا تنظلينها قولي ما شاء الله .

بنفس الوقت دخل ابو فهد البيت مع ولده فهد توهم راجعين من عزيمه اخوه جاسم .
شهد : هلا الغالي هلا ... حيا الله ابوي .
ابو فهد : هلا فيج هلا بالغاليه
وصعد داره لانه شكله كان تعبان بنفس الوقت دخلت جود الصاله والشعر مرفوع لي فوق وخصلاتها نازله على ويهها وحاطه القلم ورا اذووها باست ابوها على راسه واهو كمل طريجه وصعد فوق .

جود : شعندكم محتشرين هني ليش ما ناديتوني ؟ ولا تبوني اروح ؟ ( بدلع )
شهد : أي والله لو تروحين احسن وتـ ..
قاطعتها ام فهد بحنيه : لا يا عيوني تعالي قعدي ويانا يا شمعه الجلاس وان ما شالتج الارض تشيلج العين .

جود تطالع شهوده وتحرها بعيونها
جود : شفتي شلون . امي تبيني موتي قهر يا بنت الثنويه ههههه
شهد : هـ هـ هـ .. ملاقه ( واهي ماده البوز )
جود راحت يم اختها وباستها وقرصت خدودها ،،
جود : يالغيوووره يا شهده تغارين من اختج ها
شهد استحت على ويهها وحست انها وايد شرانيه ، صارت خدودها حمرت وطالعت جود بطرف عينها اللي كانت قذلتها مغطيتها.

جود : إلا اقول يما انا باجر بطلع شوي مبجر لان بمر المكتبه العامه بشوف لي جم كتاب لان الدكتور كلفني ببحث وبسويه ان شاء الله اروح الصبح بس بشوف محبوب سايقنا لان سيارتي الوالد وداها الكاراج.
ام فهد : خلاص ماشي يا اكبر مهندسة بالدنيا كلها بس قولي حق ميري تقعدج الصبح عشان ما تروح عليج نومه .
فهد : اذا تبين انا اوديج تره عادي بدال هالمحبوب باشا تره انا خدماتي بالسنه مره واذا رفضتي انتي الخسرانه لان ملك جمال الكون ودرب التبانه قرر يوديج وانتي رفضتي .
جود : وييييييهك فهيد يالجيكر بس ماني قايله لأ،لاني صراحه مالي خلق محبوبو يتميلح على صماخي من الصبح .. ودام الهيئه العامه للخدمات والتوصيل الاستاذ فهد بن محمد تكرم وبيوديني فأنا موافقه . (( واهي شاقه الحلج ))
شهد (( ماده البوز شبرين )) :لااااا ،،وانا منو يوديني المدرسه ؟ جود سيارتها خربانه وفهد بيودي جود لايكون بتخلون السايق يوديني ؟؟!! لا مابي السايق يفشل ..
فهد: يا ذكائج يا شهدو الصبح منو بيشوفج ؟ خليها بالهده احسن لج .. بالهده رفيجاتج يكونون كلهم موجودين فأنا أيي اخذج بالهده احسن .
شهد ( افتشلت) : انزين يالله انا عيل دامي ضمنت السالفه بروح انام تصبحون على خير ..
ام فهد : وانتي من اهله .. وانتو بعد شمقعدكم روحو نامو احسن لكم ؟؟
جود : أي والله على شورج بروح انام وراي قعده من الصبح، وانت فهود قوم عشان توديني ، تصبحون على خير .
فهد : يالله سرينا ، تصبحون على خير .
ام فهد : وانتو من اهله يا وجوه الخير .

الكل راح داره ،، ام فهد نادت ميري تنظف الاغراض اللي طايحه وقالت لها تقوم جود الصبح وصعدت فوق .. دخلت الدار ولا تشوف بو فهد على السرير ويتعرق ..قربت منه تكلمه ما يرد ..

ام فهد : بو فهد .. محمد .. محمد .. رد علي !!


شنو صار بأبو فهد ؟؟ ليش مو قاعد يرد ؟؟ ليش صعد فوق بسرعه ،، اسأله وايد تتردد .. ولهــا اجابه قريبه ان شاء الله

الجزء الثاني

ام فهد شالت اغراضها اللي بالصاله وقالت حق ميري تقعّد جود الصبح وصعدت دارها عشان تنام .. انصدمت يوم شافت ابو فهد متمدد على السرير ويتعرق

ام فهد : محمد .. محمد .. رد علي شفيك ؟؟ فهااااااااااااااااد فهاااااااااد تعال شوف ابوك مو قاعد يرد علي (( واختلط صوتها بالدموع ))
فهد راح حق امه يركض وميت خوف على امه: يمه ... شصاير ؟؟
ام فهد واهي تبجي : ابوك فهد ابوووك .. مو قاعد يرد شوفه مادري شفيه
فهد واهو مرتبك : خير يايما خير لاتحاتين انا الحين اوديه المستشفى بس انتي هدي ولا تحاتين
ام فهد : خلاص ألبس عباتي وأيي معاك .
فهد : لا يمه خلج مه البنات بعدين يقعدون يحاتون .

دق فهد على الاسعاف ، وبعد ربع ساعه وصلت الاسعاف خذو بو فهد ونقلوه للمستشفى وراح وياهم فهد .
بهالاثناء طلعت جود من غرفتها تسأل شسالفه الازعاج اللي صاير
جود واهيا مخترعه : يمه شفيج تبجين ؟ يما ردي شفيج ؟
امها ما ردت عليها كانت شبهه منهارة وخايفه على ابو العيال ، ومن لها غيره ،، كان معاها دايما بالحلوة والمرة ، يحبها حب ما بعده حب ..

جود : يما قولي شفيج خرعتيني ؟ وين ابوي ؟؟
ام فهد : بالمستشفى راح مع فهد ( واهيا تمسح دموعها )
جود حاولت تهدي الوضع بطريقتها ..
جود : يما لا ان شاء الله مافيه شي تلقين ضغطه مرتفه شوي وتعب وراح يرد لنا ان شاء الله .. خلاص يما ما يهون علي اشوف هالدموع ..
هدت الام شوي من كلام بنتها وقعدت تدعي حق زوجها ان الله يرده بالسلامه


في المستشفى دخلو أبو فهد العنايه المركزه ،، الدكتور دش عليه وصارت الحركه سريعه بالمستشفى.. وفهد واقف بره يدعي حق ابوه .. وكان شكله مرهق ، مرت تقريبا حوالي الساعه .. والدكتور لي الحين بغرفه ابو فهد .. وفهد يحاتي ابوه .. هذا الابو .. هذ1 اللي ربانا وتعب علينا .. وكان يكد ليل ونهار لين وصلنا لهالمستوى .. قطع تفكيره الدكتور فيصل ::

الدكتور فيصل : يليت اعرف من حضرتك ؟؟ وشنو تقرب له ؟
فهد : هلا والله دكتور ، انا فهد ولده.
الدكتور : يا هلا والنعم .. تطمن الوالد مافيه الا العافيه ،،بس مجرد وعكه صحيه وشوي السكري مرتفع عنده ويحتاج راحه وخل يدير باله على اكله الظاهر مكثر حلو او دهوون ،، وان شاء الله باجر يكون احسن واحسن وتقدرون تطلعونه
فهد : يعني ما فيه شي دكتور .. اقدر ادخل اشوفه الحين ؟
الدكتور : أي الحمدلله مجرد سكري وبس .. تقدر تدخل عليه بس اهو نايم الحين
فهد : تسلم دكتور ما تقصر

ودخل فهد على ابوه اللي كان مبين عليه التعب وكان نايم ، قعد يمه وباسه على راسه وقاله ماتشوف شر يبا . ابو فهد حس بوجود ولده يمه وارتاح لانه كان دايما خوفه ان عياله يتخلون عنه بكبره بس طلعو عند ويهه وبيضو الويه ، ماخاب ضني فيكم يا عيال محمد ما خاب ضني ..
طلع فهد من الغرفه ووصا الدكتور على ابوه ورد البيت ، الكل كان بالصاله تحت ينتظرون ما عدا شهد اللي كانت نايمه وماحست بشي لان جود نبهت امها انها ما تقعد شهد ولا تعلمها عن شي لانها متعلقه بابوها وايد وخافت عليها انها تنصدم ، كانت الساعه قريب الـ 2 الفجر ،انفتح باب البيت وام فهد قلبها فز .. من دخل فهد البيت الام ركضت له ::

ام فهد :بشر وين الوالد ؟
فهد : تطمني الوالد بعافيه والحمدلله الدكتور طمني ومجرد وعكه صحيه وشوي السكري مرتفع عنده وبس مو اكثر .
ام فهد واهي خايفه من كلام فهد : اكيد يعني مافيه شي ؟
فهد : لا يما الحمدلله والدكتور فيصل ماقصر وشالنا بعيونه .
جود : شفتي شلون ؟؟ مو قلت لج مافيه شي الحمدلله بس انتي عفستي الدنيا علينا ،، وبدال ما تدعين له خرعتي نفسج وخرعتينا معاج .. يالله يما روحي ارتاحي مو زين لج القعده الزايده .
فهد : يالله يما تامرين على شي انا بصعد فوق انام تعببباااااااااااااااااااان حدي
ام فهد : مشكور ياضناي .. تسلم وماقصرت .

كلهم صعدو فوق ، فهد راح داره وغير هدومه ونام .. وجود خذت امها ووصلتها غرفتها وراحت تنام ،، الكل نام بعد هاليوم المتعب .. وام فهد ما يالها النوم وكانت طول الليل تدعي ان الله يشافي ابو فهد ويقومه بالسلامه .

اليوم الثاني الساعه 8.45 الصبح
جود : يالله فهدوووو قوووووووووووووووم الساعه 9 صارت واحنا لي الحين بالبيت قوووم بنروح حق الوالد بعدين بنروح المكتبه يالله بنتأخر ومحاضرتي تره بتطوفني .. تكفا قووم يالله تره طقت جبدي انا
فهد : ان شاء الله روحي انتي قعدي رغد
جود: أي رغد أي بطيخ ,, رغد راحت المدرسه من زمان وانت تقول قوميها ,, اقولك الساعه تسسسسسسسسعه فاهم ؟؟
فهد واهو يفرك عيونه : اووووخ الساعه 9 ؟؟ اوووله انا شلون راحت علي ونسيت .. اليوم أي يوم ؟
جود : الاحد !! شاللي نسيته ؟
فهد : هاااااااااااا ؟؟ الاحد ؟؟ اوووووووووووله .. يالله يالله بسرعه بدلي خل نطلع الحين لا نتأخر
جود : فهدو شفيك ؟
فهد : ها .. لا ماكو شي .. بس انتي عندج مادري شنو بالمكتبه وبمر الوالد راح اتأخر يالله روحي بدلي ..

راحت جود غرفتها تبدل هدومها عشان تروح حق ابوها بالاول بعدين تروح المكتبه وتجهز البحث وبعدين وراها محاضره الساعه 11.30 ،، لبست جود تنوره بيضا متداخل فيها خطوط زهريه وبدي أبيض وركبت بروش وردي شكله جنان ،، ولبست لفه ورديه وكعب ناعم ابيض ،، كانت جنان ويهها انثوي من الدرجه الاولى !!

طلعت بره دارها ولا تشوف فهد كاشخ كان لابس جينز ديرتي وقميص بيج زرايره شوي مبطله من فوق ومجفس الكموم من عند الساعد وشعره مسويه مخربط وناعم وشكله كان ذرب .

جود : شدعوه شدعوه يالكنج ( وتس أب برذر ) حدك كاشخ ( واي؟ ) اعترف ها ها ؟؟ منو بتشوف لايكون صار عندك (قيرل فرند من ورانا ) قول قول ؟!!
فهد وهو مسوي نفسه يعني حده اللي ما يعطي ويه : اقولج شي غلطان انا اوديج .. محبوووووووووووووب تعال تعال ودها ..
جود : لالا لا لا لا خلااااااااااص يا شيخ ،، شزينك يا توم كروز بس ودنا مو ناقصين تأخير
فهد : عاد صج شكلي حلو ؟؟
جود : أي والله شكلك حدك كوووول .
فهد : عبالي بعد .. يالله امشي خل نروح تأخرنا على ابوي .
جود تتحلطم عليه وتقول بخاطرها مادري شسالفته هذا اليوم !!

طلعو من البيت راحو المستشفى .. الدكتور رخص ابو فهد ، فهد شكر الدكتور فيصل على اهتمامه . وطلعو من المستشفى ،، جود اللي كانت تنطرهم بالسياره على احر من الجمر رن تلفونها

امينه : الوو جووودي وينج ؟
جود : بالمستشى انطر فهد يطلع ابوي
امينه : خير شفيه عمي ؟
جود : امس تعب علينا وتنوم بالطبيب والحين فهود بيطلعه ، ان شالله يطلعه وايي لج المكتبه .
امينه : سلامته مايشوف شر ،، خلاص اوكي ماله داعي تعنين اهلج خلاص انا اوديج الكليه واردج البيت لان اليوم انا محاضرتي وياج .
جود : خلاص اوكي امونه ،، ما قصرتي حبيبتي .
امينه : العفو .. باي

سكرت جود التلفون ولا ابوها يفتح باب السياره ..
جود : الحمدلله على سلامتك يبا .. ماتشوف شر والله خرعتنا عليك
ابو فهد : يسلمج جود .. لا تحاتين الحمدلله انا بخير بس الظاهر لان امس بعزيمه عمج شوي خربطت بالاكل
ركب فهد السياره ووصل جود المكتبه ، ومعاهم ابوه ، جود قالت حق اخوها ان ماله داعي يرد ياخذها لان رفيجتها امينه راح تردها نزلت جود المكتبه ومشا فهد .. ورد ابوه البيت .

في بيت ابو فهد ..
ام فهد : هلا بابو عيالي نور البيت يالغالي خرعتني عليك ما تشوف شر بو فهد .
ابو فهد : الشر ما اييج يا الغلا كله .. انتي شلونج ؟
ام فهد : تمام بشوفك

قعد بو فهد مع مرته فتره ويسولفون ومبين ان ابو فهد كان الحمدلله بخير وصحه .. وفهد كمل طريجه بعد ما قط ابوه البيت ..

بالمكتبه .. جود وامينه كانو يسوون البحث وخلصوه بسرعه لانه كان موضوعه سهل ومتوفر بالمكتبه .
طلعو من المكتبه وراحو الكليه . لان المحاضره بقا لها ربع ساعه ، بالسيارة شغلت جود المسجل على اغنيه سود العيون مالت عيضه المنهالي .. كانت هالاغنيه دايما تقول انها اهداء حق جود لان عيونها وساع وسود وحلوين

جود : ها هالمره الاغنيه اهداء ولا خلاص عزلنا ؟؟
امينه : لا عزلنا ههههههه .. لا ياوخيتي اكيد اهداء ومن صمام قلبي الكبير اللي ماكو مثله هههههه
جود : هههه .. الثقه مو زينه وانا اختج .. بس مشكوره يالغاليه ..
امينه : جودي مادري شنو بسوي اذا تزوجتي وخليتيني ؟
جود : شدعوه عليج ماتدرين يمكن انتي تتزوجين قبلي
امينه : بكل الحالات راح نفترق
جود : لا يبا فال الله ولا فالج .. بس شدراج يمكن توم كروز بيتنا يحبج ويعجب فيج ويتزوجج
امينه : ههههههه لا يبا الله لا قاله .. اخوج مادري شلون قايل .. شايف روحه احس ومايعطي ويهه حتى حق ظله
جود : ولد الاجاويد فديته اخوي
امينه : وييييه هذي اللي قامت تتفدى اخوها هههه ..
وصلو الكليه . ودخلو المحاضره ،،

من جانب ثاني .. بـ مرينا مول على البحر .. كان الوضع مختلف
كان فهد قاعد ومن بعيد وحده واقفه مع رفيجتها ، كانت لابسه جينز وجبنيز وفاله شعرها الاشقر .. كانت ملامحها جريئة .. وحاده ..والمايله لملامح الاجانب وايد
رن مو بايل فهد .. (( ياللي على البال تطري وانت ماتدري .. وش ذنب قلبن يحبك وانت خليته وشذنب قلبن رسم لك حبه العذري وش ذنب دمعن على طاريك هليته)) مالت سلمان حميد

فهد : هلا بالقمر اللي قاعد بعيد عني ومخليني احترق هني بروحي ،، هلا يا احلى نور بالدنيا كلها .
نور : هلا فهودي .. انت اتينن اليوم وصاير (( لايك ذا مووون )) .. وكل مره احلى من الثانيه بس فهــّادي انا الحين بروح البيت (( دو يوو وونت اني ثنق )) ؟
فهد : لازم الحين ؟ انا ما مليت والله قعدي شوي ..
نور : أي يالغلا (( آآي هاف تو قوو ))انا تأخرت ،، مع اني والله ما مليت منك حبي .
فهد : اوكي خلاص براحتج حياتي بس ديري بالج على عمرج بالطريج .. ومن توصلين دقي ،، وعيونج بالارض مو تطالعين لا يمين ولا يسار ولا بتروحين فيها
نور : هههه .. ان شاء الله من عيوني يالوحش
فهد : تسلم عيونج ،، يالله قلبي بيباي
نور : جــاو

نور كانت حبيبه فهد ،، كان يحبها لحد الجنون واهيا حاطته بعيونها .. وما تطالع غيره .. علمها الحب الحقيقي ،، ووهب قلبه عشانها ، مع انها ما كانت بذاك الجمال بس حلا روحها خلاها ملكه بعينه ..
كان كلامها وايد فيه قطات انقليزيه كون امها امريكيه ، كان ناوي يتقدم لها باقرب فرصه بس ناطر الوقت المناسب عشان يفاتح اهله بالموضوع ، وبنفس الوقت كان خايف من رده فعل اهله من ناحيه ان البنت امها امريكيه ، وما عندها ابو لانه متوفي من زمان .

ركب فهد البورش وطالع الساعه ،، اووووخ الساعه 12.30 .. شهدووو طلعت من المدرسه ،، رحنا فيها راحت علينا !!

بالكليه .. جود وامينه خلصت محاضرتهم .. جود راحت الكفتيريا تنطر امينه لانها قالت انها بتمر على الدكتور عندها جم شغله تعطيه . كانت جود منشغله بالاوراق اللي جدامها وتقلب فيهم ، وما لاحظت اللي كان قاعد من بعيد ويراقبها ،، كانت مندمجه بالقراءة والكتابه وايد ومالها شغل باللي يمها .
شوي ولا امينه اتيي حق جود

امينه : جوجو انا ييت .
جود انقزت من الخرعه : بسم الله الرحمن الرحيم !! انتي متى يتي ؟؟ خرعتيني
امينه : ههههههههههههههههههههههههههه امبي انتي شنو خوافه !! صج خبله !
جود : ماشي يا امانوووو ان ما رديتها لج
امينه : هههههه يالله خل نروح بنروح نتغدى انا ميته يوووع
جود : اوكي يالله

لمت جود اغراضها ومشت .. ما لاحظت ان ورقه طاحت منها .. راحو السيارة ،، جود قعدت ترتب اوراقها اللي متعفسين .. شوي ولا تسمع صوت جام السياره ينطق .. التفتت ولا واحد واقف .. طويل حنطاوي عنده قفل جسمه حلو ومغتر ..

بطلت امينه الجامه حق الصبي اللي واقف بره عشان جود تسأله شنو يبي ..
جود : أأأ أأ .. خير اخوي ؟
الشاب : الخير بويهج اختي .. بس وانتي قايمه طاحت منج هالورقه فحبيت اردها لج خوفي تضيح ومبين عليها انها مهمه .
جود واهي منحرجه من طفاقتها : مشكور اخوي واسفين عنيناك
الشاب : العفو ولو حياج الله اخت عزيز وغاليه .. السلام عليكم
جود : وعليكم السلام

راح الصبي وجود لي الحين مو مستوعبه الوضع من الفشيله خذت الورقه وحطتها بالملف بسرعه

امينه : جودي شسالفه الورقه ؟
جود : امبي مادري الظاهر وانا بالكفتيريا طاحت او شي ..
امينه : بس والله شكله خوش واحد محترم وبيني وبينج جميل ما شاء الله عليه
جود وويهها صاير اشاره مرور من الفشله : واااااااي انا وين وانتي وين ،، انا مفتشله وانتي تقولين جميل وقبيح
امينه : وشكله معجب .. ما شال عينه من ويهج
جود : وانا ما طالعت ويهه !!
امينه : او او او شفيها المستحيه ؟؟ لايكون وقعتي بالحب ؟؟
جود بجديه وانحراج : امينه بلا عبط خلاص

امينه حست ان جود صج منحرجه من الموقف وخصوصا جود سجلها نظيف ومالها أي احتكاك مع أي ريال من قبل ،، مشو بالسيارة راحو مطعم وتغدو .. امينه قطت جود البيت واهي راحت بيتها.

جود دخلت البيت .. كانو كلهم عند التلفزيون دخلت جود سلمت على الكل .. وراحت دارها تبدل ونزلت مره ثانيه..

ابو فهد : حيا الله بالجود نورتي الصاله تعالي قعدي يم ابوج .
جود : النور نورك يبا بوجودك وبوجود الوالده .
شهد : الجود انصحج نصيحه لوجه الله وادري انها داشه عرض .. بس انصحج لا تخلين فهدو هالقوطي ياخذج من مكان لانه راح تنزرعين عدل !!
جود : ويي ليش لايكون زرعج اليوم ؟
شهد : طلع روحي مت من الحر باليالله يالي ،،، ويوم يا ماكو احد بالمدرسه مالت عليه .. ما استفدت منه شي
جود واهيا تتطنز على اختها : ميخالف ميخالف هذا حظج .. حظج من يوم انولدتي مقرود

فهد ما كان منتبه لهم كان يفكر بنور .. شوي ولا يرن تلفونه ،،
فهد صعد فوق على طول ..
نور : hallo baby
فهد : هلا بنور الدنيا هلا بعمري .. وينج والله كنت قاعد افكر فيج واحاتيج
نور : thinking of me ?
فهد : أي يا قلبي
نور : تسلم يا غلاتي بس حبيت اقولك انا وصلت لانك طلبت منى اني ادق اذا وصلت البيت ..
فهد : زوجه مطيعه
نور استحت : ...
فهد : الو
نور : ((يس ))
فهد : شفيج سكتي ؟
نور : كنت افكر بكلمتك .. يعني انتي صج تتمناني زوجه ؟
فهد : اكيد اتمناج وليش ما اتمنى ؟
نور : ما غلطت يوم عرفتك ورضيت بحبك
فهد: وماغلطت لمن اخترتج يا قمر ليلي وترا باجر نبي نتغدا مع بعض اوكي ؟
نور : ثانكس حبي وان شاء الله نروح نتغدى باجر .. الحين بروح مامي تناديني
فهد : اوكي حياتي تيك كير بيباي

سكر فهد التلفون واهو يفكر بحبها وحياته معاها ويتخيلها زوجه المستقبل وانه راح يكون اسعد الناس معاها ..
بنفس الوقت صعدت جود فوق وامها وابوها راحو ينامون (( يقيلووون )) ،، جود نادت شهد وراحت معاها عند فهد وقعدو يسولفون ..

جود : فهوود يالله متى تتزوج نبي عرس
شهد : أي والله عفيه يالله تزوج لي متى بتظل عزوبي
فهد : بسم الله الرحمن الرحيم .. شفيك يايين بشياطينكم ؟؟ نازل عليكم الوحي قايل لكم روحو قولوله يتزوج !!
جود : لا فهود بس والله ودنا بعرس ، اخر عرس كان عرس رغد ومن زمان صار له سنتين .
فهد : ياحبكم للعروس يالحريم .. انتي تزوجي بدال ماترفضين هذا وهذاك والله شوفي شكثر رياييل يووو شارينج بس انتي ترفضين ،، تره والله مو زين جذي بتطيحين سوقج ..
جود تضايقت من الموضوع لانها تدري ان اللي يو لها كلهم مو زينين واهيا استخارت فيهم : فهد عفيه غير الموضوع تكفا وانا تره مارفضتهم على هبال انا استخرت فيهم وماطلعو زينين ..
فهد حس ان اخته متضايقه : المهمـ ،، الا اقول شهوده شرايج باللي سويته فيج اليوم ؟ هههههه والله ما انسى شكلج اليوم وانتي معصبه
شهد تطالعه بطرف عينها من ورا الشعر اللي مغطيها: اوريك هيييييييييين يالمليق ،،

رن تلفون جود ..
امينه : الو جودوووو وينج ؟
جود : بالبيت شفيج بعد ؟
امينه : عندي بشاره بمليووووون
جود : خير ؟
امينه : اختي فاطمه بتتزوج .
جود : كولولوولوولوووووووووووش ،، بالبركه عأبالج يختي نفرح فيج تتزوجين توم كروز !!
فهد يطالعها بنص عين : جنه سمعت اسمي
امينه : امبي زين جذي فشلتينا ..
جود : وي وي استحت
امينه انحرجت : يالمليقه خلاااااااااص .. والله انحرجت المهم .. انا بروح الحين بشوف عروستنا باي
جود : باي يا حرم السيد توم ههههه

فهد : مسكينه احرجتيها
رغد : مو جني انا مضاف اليه هني ،، يالله انا بروح اكلم اسراء رفيجتي احسن لي يالله بيباي
جود: يالله انا بروح بعد ..

فهد قعد بروحه .. ولا يوصل له مسج من نور (( حياتي انا بروح اودي امي الستشفى تطق ابرتها ))
رد عليها (( ديري بالج على روحج يا عمري .. وانا اموت عليج ))

بغرفه جود .. جود كانت ترتب اغراضها وتتذكر السالفه اللي صارت لها اليوم مع الشاب المغتر .. قعدت تستجمع ملامحه .. صج كلام امينه كان جميل !! طردت الافكار الهبله من بالها.. قعدت ترتب الاوراق
طلعت الورقه اللي عطاها اياها الصبي ،، معقوله هالكثر اهيا كانت منحرجه لدرجه انها ما طلت بالورقه اللي عطاها اياها ،،
دورت بالاوراق جان تلقى الورقه ولا المصيبه .. الورقه ورقه بياناتها اسمها الكامل ورقمها ورقم البيت ورقم البطاقه المدنيه وكل المعلومات الهامه موجوده بالورقه .. وخافت انه قاري اللي فيها ..

سفطت الورقه ولا من وراها مكتوب كلام بخط الايد .. استغربت لانها ماتذكر انها كاتبه شي بظهر الورقه ..
وقعدت تقرا المكتوب ....

الجزء الثالث



سفطت الورقه ولا من وراها مكتوب كلام بخط الايد .. استغربت لانها ماتذكر انها كاتبه شي بظهر الورقه ..
قعدت تقرا المكتوب ..
(( السلام عليكم .. اختي انا صار لي فتره اراقبج وانا اسف على هالكلام .. بس جد انا معجب فيج .. مادري شنو بيكون تفكيرج لو شفتي هالكلام بس والله .. الله يعلم ان انا نيتي صافيه ويوم شفتج انعجبت فيج جود الورقه شفتها بس تأكدي انها بأمان ومستحيل اضرج بشي .. مصعب ))

جود انصدمت من الكلام ماعرفت شنو تسوي تقول حق منو ؟ وكانت خايفه ان يكون هالشاب اللي اسمه مصعب يكون مو شي او ان يضرها وخصوصا ان الورقه اللي طاحت بيده مهمه
جود تعوذت من بليس وقامت صلت المغرب وقعدت تدعي .

ميري الخدامه : جود تعالي تهت ماما يبي انتي .. في اخو بابا حمد مع بنات مال هوا ..
جود : اوكي انا نازله الحين .. شهوووده عمي حمد تحت مع بناته تعالي خل نروح نجابلهم مالي خلق يقعدون يحشون فينا بعد ..

جود وشهد نزلو تحت حق عمهم وبناته ،،
دخلو اول شي الدوانيه اللي ما كان فيها غير عمها وفهد وابوها وسلمت على عمها اللي كان قاعد ويبتسم لها ..
حمد : هلا والله بالجود والشهد هلا بالحلوات ... شزينهم صايرين
جود وشهد : تسلم عمي شلونك انت ؟؟
سولفو مع عمهم وراحو قعدو مع امهم وبنات عمهم ،،
هديل : هلا جود شلونج ؟
جود : تمام الحمدلله
هديل : وييييييه من زمان مو شايفينج وينج فيه
جود : والله بالكليه ولاهيه ويا الدراسه
شهد : وضحه أي صف انتي ؟
وضحه :ثانيه ثنوي
شهد : يعني اصغر مني سنه
يالله زين نصير ربع ..

وقعدو يسولفون لين بالليل .. بعدين عمهم قال حق البنات يالله لانهم بيمشون .. سلمو على بعض وراحو ،، اول مره يحسون ان بنات عمهم قراب منهم وانهم مرتاحين معاهم ..

جود : يما احسن هديل وضحه صايرين زينين .
ام فهد : اهما من زمان زينين بس انتو مادري ليش حاطين هالفكره براسكم
شهد : انا من زمان قايلتها بس اهيا ما تطيع
ام فهد : مشكله اختج عنيده
جود بدلع : لا انا مو عنيده
ام فهد : لا مو عنيده كلش ههههه
جود سمعت تلفونها يرن فوق استأذنت امها واختها وصعدت فوق

ولا (لديك رساله جديده) ::
(( قاعد من بعيد وشفتها .. بنتن يغار البدر من حلاها
والله اخاف اغلط في وصفها .. والخفوق كله يقرب في رجاها
اسف عالمسج .. انا مصعب ))

جود ماعرفت منو مصعب بعدين تذكرت .. مصعب شنو يبي هذا ؟؟ ترددت ترد ولا لأ .. اخر شي قررت تكتب

(( هلا اخوي .. اعتقد مابيننا شي عشان تدز هالمسج ،، اسفه عالكلام بس لاني ماحب هالسوالف ))
ودزت المسج

من الطرف الثاني كان مصعب ينطر المسج بفارغ الصبر .. البنت صج عجبته ،، ودخلت قلبه وعجبه ثقلها ورقتها وخجلها .. وصل له مسج جود تضايق شوي بس قرر يرد عليها
(( والله يا جود إني شاريج واشيل عيوني واحطج بدالهم بس ابي فرصه ،، وتأكدي انا مو مثل باقي الشباب ))

جود ردت عليه
(( صعب اتخذ قرار صعب مثل هذا .. الله يقدم اللي فيه خير ))

مصعب كل ما ياله ويعجب بشخصيه جود ورجاحه عقلها .. وصل له هالمسج وقال : صج هالبنت عقلها كبير ورزينه ..

فهد كان قاعد ويا ابوه بالدوانيه يطالعون مباراة استأذن ابوه وصعد فوق ،، واهوا عالدري وصل له مسج ::
(( قوة اخوي .. مادري شقولك .. بس تره نور بالمستشفى سوت حادث ))
فهد انصدمت وبغى اين من المسج دق على طول على الرقم اللي داز له المسج ..
فهد : نعم ؟؟ منو انتي ؟؟ شنو تبين
البنت بصوت باكي : والله صج كلامي اهيا بمستشفى المواساة غرفه ** جناح **
فهد : مشكوره اختي
البنت واهي تتنهد : العفو

فهد راح بدل هدومه بسرعه وطلع سألته امه وين رايح مارد باله مو معاه ..باله مع نور حياته .. نور قلبه بدونها يموت

ركب السيارة وداس عالاميه وعشرين وطار لها ،، وصل المستشفى يركض يدور غرفتها .. ولا اهيا بالعنايه المركزة وعليها مليون جهاز وحاولينها دكاتره وامها بغرفه ثانيه بس حالتها مستقره ..
فهد واقف بره ميت خوووف على نور ، وقاعد يدعي حق نور ان الله يشفيها .. سأل واحد من الدكاتره اللي طلعو من غرفه نور .. قاله ان عندها نزيف داخلي وان شاء الله انه يوقف ..
فهد دارت فيه الدنيا وانصدم ،، نووور نزيف داخلي ... نووووور حياتي نزيف بمخها .. يارب شهالمصيبه
ظل واقف جدام الجام الزجاج يطالع حياته وحلمه يتعذب يطالع حبيبه روحه والاجهزة محاوطه ويهها الصغير ..

ليش يا نور اللي قاعد يصير ؟ نوري يا نور دنياي ابيج يمي تكفين خلج قويه عشاني ،، لانج تدرين ان انا ماقدر اعيش بدونج .. ظل واقف فترة طويله لين الدكتور قاله انه لازم يمشي الحين لان يبنقلونها قسم ثاني ..

طلع فهد من المستشفى واهو مو عارف وين يروح ، احزان الدنيا بويهه ،، مايدري وين يروح هذي نور هذي حياته وروحه وعمره وكيانه ، وهذي البنت اللي اختارها من بين كل بنات الكويت

رد البيت تعبان ومتضايق
امه وابوه كانو بالصاله دش سلم عليهم وصعد داره ، امه لاحظت عليه انه فيه شي بس ماقالت شي ، خلته على راحته ..
جود كانت بدارها تفكر باللي قاله مصعب .. جد اهوا يحبها ؟ جد اهو غير عن الشباب الثانين .. صج ماكو مثله ؟؟ وهل في شباب زينين هالوقت ؟؟

نامت جود والموبايل بيدها ..
** بحر عالي وامواج وسفينه كانت جود على ظهرها .. البحر صار عالي والسفينه تتحرك يمين يسار لين انكسر جزء من قاعده السفينه واخترب محرك منها قام الماي يدخل السفينه ،، كابتن السفينه امر ان كل الركاب يقطون الامتعه عشان يخففون الحمل ونزل قوارب النجاه .. القوارب انترست وظلت جود على ظهر السفينه والسفينه تغرق ،، يالها واحد عطاها ((لايف جاكت )) ومسكها وطب بالبحر لين وصلت الشاطي **
قامت جود من الحلم مخترعه ،، ومستغربه من الحلم تعوذت من بليس ، كانت الساعه تقريبا 4 الفجر طلعت تتوضا عشان تصلي .. شافت ليت دار اخوها مبطل

طقت الباب ودخلت ،،
جود منصدمه : فهد؟ شفيك ؟؟؟
فهد واهو يمسح ويهه : سلامتج مافيني شي
جود : فهد انت مو طبيعي صارلك جم يوم ،، شفيك
فهد : جود تكفين والله متضايق ومالي خلق شي ..
جود : براحتك .. بس تراني اختك واي وقت تبي تقولي انا موجوده
يالله قوم صل وتعوذ من بليس انا بروح اصلي
فهد : ان شاء الله .. مشكوره جود

جود طلعت وحاسه بحال اخوها حاسه ان فيه شي .. راحت صلت ودعت حق نفسها وحق اخوها وامها وابوها واختها وكل الغالين عليها .. وما نسيت امينه رفيجه دربها واللي تعتبرها اكثر من اختها .

ثاني يوم الصبح .. فهد قام من النوم على طول راح المواساه راح حق نور
وقف ورا الجام مالت الغرفه .. وعيونه مغورقه دموع .. أي كان يبجي .. يبجي على حبه اللي جدامه يبجي على روحه اللي جدامه .. حياته ونبض قلبه ..

مو عيب الريال يحس ومو عيب الريال يدمع ومو عيب الريال يبجي ،، أي يبجي .. الريال عنده احساس ، عنده مشاعر ، ومو نقص بالرجوله او غلط اذا الريال دمع وبجى ،،

فهد راح سأل الدكتور عن حاله نور .. كان جواب الدكتور مثل السيف على راسه .. النزيف ما وقف .. وانخاف لو استمر النزيف تتدهور الحاله .. قو قلبك اخوي ..
كانت كلمات الدكتور تذبح . .. استأذن فهد الدكتور انه يدخل على نور وسمح له ..
دخل عند نور مسك ايدها .. اول مره يوقف قريب منها بهالمسافه .. اول مره يلمسها .. كانت ماتسمح له يقرب منها بس الحين اهو احوج لها من أي لحظه ثانيه ..

قعد يكلمها واهو يدمع
فهد : نور ردي علي نور .. قلبي ردي علي .. والله احبج وماقدر اعيش بدونج ،، نور ان رحتي اخذيني وياج .. انا فدوة لج لو تبين عمري اعطيج .. بس ردي كلميني قولي لي فهد احبك .. ولا مابي احبك .. ابي تقولين اكرهك .. اكرهك لانك سمحت لي اطلع .. انا لو ما كنت سامح لج تطلعين جان ما صار اللي صار .. نور تذكرين يوم تدقين علي تقولين لي احبك ؟؟ تذكرين حبنا واحلى ايامنا .. نور اذكر اول يوم شفتج فيه .. كنتي مغروره بس حبيتج .. كنتي قاسيه بس تحملت .. الحين انا ضعيف جدامج مابيدي شي اسويه لج .. انا وعدتج لو اقدر اعطيج عمري عطيتج .. بس كل شي صار فوق طاقتي .. نور حياتي ،، ونبض قلبي .. انا اسف لاني سمحت لج تطلعين .. كانت غلطتي من البدايه ..

نور كانت بغيبوبه ومو حاسه بالدنيا .. بس فهد كان مرتاح لانه قاعد يكلمها .. مرتاح لانه قريب منها من حبه الاول والاخير

دخل الدكتور .. وفهد لي الحين ماسك ايدها ..

الدكتور : ان شاء الله تتحسن .. ادعو لها ..
فهد : منزل راسه مايبي احد يلمح دموعه : الله يسمع منك دكتور
الدكتور قعد يضبط الاجهزة وطلع ..
فهد خذا القرآن وقعد يقرأ على نور ويدعي لها ..
رد فهد البيت واهو حاس انه محتاج يقول حق احد .. وده يشكي حق احد
فهد بقلبه : ااااااااخ يليتك هني يا حسووووون جان انا مو جذي حالي
( عبدالمحسن ولد عمه جاسم .. كان مثل اخوه واكثر .. سافر امريكا يدرس هندسه وراثيه وما بقاله شي ويرجع )
قعد يردد شعر كان ولد عمه عبدالمحسن كاتبه ..
لين اموت وحبك بقلبي مايموت // ولين اموت انا لغيرك ما هويت
ولين اموت ابقى احبك في سكوت // ولين اموت لحب غيرك مابكيت
ولين اموت غيرك بقلبي ما يفوت // ولين اموت احدن بديلك ما لقيت
ولين اموت انا احبك لين اموت // ولين اموت احدن لغيرك ماهويت

وصل البيت وقعد مع اهله وباله مو معاهم .. جود كانت وايد متعاطفه مع اخوها وحاسه ان في شي بالموضوع..
رغد كانت اغلب وقتها ويا رفيجاتها فما تدري شنو يصير بالبيت ..

جود : فهووود شلونك اليوم ؟؟
فهد : تمام جودي
جود : اووووه اول مره تقولي جودي
فهد : شفتي شلون الزمن يغير اللي ما يتغير
جود : شفيك صاير شيبه ؟؟
فهد : مافي شي .. وين شهوده ؟
جود : بيت اسراء عازمتها اليوم رفيجتها على الغداء ،، تره اليوم انا بروحي رحت الجامعه ابوي طلع سيارتي من الكاراج .
فهد : أي اشوه .. تعالي شلون وضحه وهديل ذاك اليوم ؟؟ ما سألتج عنهم
جود : والله يهبلون صايرين خوش بنات اليوم يمكن نطلع مع بعض بنروح شرق مع مرت عمي .
فهد : أي زين تستانسون ولا تنسين اتيبين لي فربتشينو من ستاربكس .
جود : تامر امر يالغالي .
ابتسم فهد ابتسامه راحه خفيفه واستأذن وراح فوق داره ..
جود قعدت تفرفر بالقنوات .. ولا يوصل لها مسج ..
(( جود في حلاها في هرجها في طبعها تجذب العين .. يازينها بنت الاصل بنت ابوها ..يوم اقبلت كلن سأل من تكونين .. فازت على كل البنات المزايين .. بنت الهارفي بذمتي كلها زين .. من راسها لي ساسها مابها شين ))

جود بدت تستغرب من هالصبي .. دش حياتها وفرض نفسه .. واهي قامت تفكر فيه ،،
ردت عليه ..
(( انا بنتـ (ن) يقال اني صعبه منال // ويقولون بعد اني قويه ما اهاب
ما رضيت الذل لو على قطعه وصال // ومن ذلني ماعاش الا تحت التراب ))

مصعب عجبه كبريائها .. وتمسكها برايها ،، وانعجب بتربيه اهلها لها ..

مصعب .. شاب بكليه الهندسه عمره 22 طويل حنطاوي منظره رجولي عنده قفل اغلب لبسه دشاديش وملامحه بدويه حلوة .. بالكليه معروف باحترامه .. من شافه قال ولد حمايل والسنع كله منه وفيه مصعب اخته العوده متوفيه بحادث.. دخلهم متوسط .. حياتهم بسيطه لكنهم معروفين بكرمهم و جودهم ..

مصعب حب جووود .. حبها من قلب .. وصار ما يقدر الا يفكر فيها .
العصر الساعه 5 رن تلفون جود ..
رنت اغنيه (( اوعدني عني ما تغيب .. تبقى هنا جنبي قريب .. محتاج انا مثلك حبيب يفهم عيوني وضحكتي ))
اغنيه اوعدني مالت عادل محمود
طالعت جود التلفون ولا (( أغرب قدر)) << كانت مسميته أغرب قدر لانها تعتبر الصدفه اللي عرفت فيها هالشخص غريبه وايد .. ردت عليه ولأول مره قررت ترد .. راحت دارها بسرعه وردت .. ماتدري شنو اللي خلاها ترد بس ردت

جود : ألو
مصعب : ألو هلا جود
جود : يا هلا مصعب
مصعب : شلونج يالجود كله ؟
جود : تمام
مصعب : انا اسف داق هالحزه بس عندي كلام بقوله لج ،، تسمحين لي
جود : تفضل
مصعب : جود انا شاريج وجد ابيج على سنه الله ورسوله جود انا مادري شقول
جود انا ..
جود : شفيك مصعب ؟؟
مصعب مو عارف شيقول : جود انا والله احبج
جود مو عارفه شتقول : .....
مصعب : اسف عالكلمه .. بس انا اعنيها من كل قلبي وتأكدي محد قبلج سمعها ولا راح يسمعها احد بعدج
جود : بس .. انا انصدمت ..
مصعب : انا اسف اذا كانت مو بمحلها .. انا استأذن الحين
جود : خلاص ماشي .. بيباي
مصعب : مع السلامه

جود سكرت التلفون وضمته على صدرها
كانت تميل لمصعب وتحس ان ماكو مثله من صج والحين قال انه يحبها ..
جود تكلم نفسها : ياربي مادري شسوي ؟؟ احبه ؟؟ ولا لأ !!
قعدت تتسائل وتقلب الموضوع بقلبها ..

بالغرفه الثانيه فهد كان متمدد السرير ويفكر بنور ويدعي لها .. لين ما غفى واهو ضام صورتها على قلبه

رن جرس الباب .. ابو فهد : ميرييي .. ميري روحي فتحي الباب هذي شهوده اكيد
ميري فتحت الباب ولا هديل بنت اخوه ..
ميري : بابا هديل يجي بنت بابا حمد .. يقول يبي جود

ام فهد : وييييييي ياحبي لها خليها تدخل ..
ميري : هيا قووول مايبي شكرا .. هيا سوي ينطر جود

ام فهد : روحي عيل نادي جود
ميري صعدت فوق ولا جود قاعده تبدل هدومها عشان الطلعه لانها مواعده هديل ووضحه انهم يطلعون مع بعض شرق
جود بدلت لبست بنطلون جينز فيه زمّ من تحت وبلوزه طويله سوداء ركبت عليها حزام فضي وجنطه فضيه .. ولفه سودا فيها كرستالات صغار تحيط ويهها القمري .. ولبست كعب شوي عالي ونزلت تحت


سلمت جود على امها وابوها وطلعت بره .. وهديل ووضحه ينطرونها .. سلمت عليهم وقعدت معاهم بالسياره وشغلو الاف ام وقعدو يسولفون

مصعب من طرف ثاني كان بسوق شرق يتمشى وكان يدور شي يشتريه حق جود وخصوصا ان عيد ميلادها قرب .. ماعرف شنو يشتري قعد يدور ويدور واهي مافارقت باله لحظه وحده ..
احبها .. وربي احبها ... سكنت خيالي من اول ما شفتها .. يازينها بنت الاصول

اخيرا طاحت عينه على كعب احمر عليه ورده من الكرستال .. دخل المحل .. قعد يطالع بس تذكر انه مايعرف مقاس ريلها ..
ضاق خلقه لانه فشل بهالهديه .. طلع من المحل وقعد يدور .. لين قرر ان يشتريلها شال فروو اصفر فاتح حس انه لايق عليها ..
دخل المحل واشتراه .. خلص من اللي يبيه من شرق فطلع عشان يرد البيت .. واهو طالع ولا 3 بنات بويهه .. يرفع عينه ولا جووود قباله ..
فز قلبه وعقله وكيانه ... ااااااااااااااخ يا جووودي .. اخ يا قلبي

جود مرت من يمه بدون ما تعرفه .. اصلن اهيا ماتذكر ملامحه
شوي ولا يوصل لها مسج :
(( يا ارض احفظي ما عليكي .. حبيب قلبي حضر ))

استغربت جود من المسج : معقوله يكون موجود هني وشافني .. شلون انا ما شفته .. وااااي يا غبائي شلون اعرفه وانا اصلن ماذكر ملامحه
دزت له
(( وين انت ياللي له القلب يشتاق .. اطفي نيران الشوق وورني طيوفك ))

شوي ولا واحد يمشي يمها بس من بعيد ..
دز لها (( شوفي يمين يالملاك ))

التفتت يمين ولا اهو بويهها .. ويهها صار احمر وانحرجت
هديل التفتت عليها ..
هديل : جود شفيج ؟
جود : هاا .. ولا شي بس راسي افتر فجأه
هديل : أي باين عليج كاهو ويهج صاير احمر
وضحه : خل نشتريلها ماي
جود : لا يا قلبي مو شرط عادي دوخه وتروح

جود سكتت وقعدت تفكر فيه .. يا زينه صج جميل ومزيون وما عليه كلام ،، أحــبــ ــ ..
هديل : جووود ما تبين تشترين شي .. تره حدج اليوم هاديه مو على طبعج دايم انتي مرحه اليوم صايره غير
جود بترقع حق نفسها : احم يعني استحي
هديل : هههههههههه يا شينج يالحياويه ..

مصعب كان من بعيد يطالعها .. وقلبه يعوره .. يحبها ومينوووووون فيها
شوي ولا يدز لها مسج
(( قمر وربي قمرر ))
ردت عليه (( وانت بعد حلو مصعب))

مصعب طار من الفرحه ماكانت الفرحه شايلته .. بغا يصرخ ويقول انه مستانس
المهم .. مصعب ما حب يحرجها وقرر انه يمشي ..مع ان قلبه عندها
واهي بعد ماكان ودها انه يمشي

ببيت محمد الهارفي .. تحديدا بغرفه فهد ..
كانت شهد توها راده من بيت رفيجتها وقاعده ويا اخوها تحن عليه ان يطلعها ..
ومتحسفه انها ماراحت ويا خواتها
شهد : فهود تكفا طلعني
فهد : مالي خلق
شهد : الله يخليك
فهد : قلت لج مالي خلق فارجي
شهد : عشان اغلى من بالكون طلعني .
(( أغلى من بالكون .. فهد تذكر نوور .. نووور .. ما راح لها بس الصبح .. قرر ان يطلع ويروح لها الحين ))
فهد : خلاص قومي بدلي بقطج عند جود
شهد بوناسه : هـــــــــــــــــــــــــيّا

شهد قامت تبدل .. لبست برمودا بيضه .. وجبنيز سماوي
فلت شعرها ولبست كاب سماوي بأبيض وجوتي رياضه .. كان شكلها حلو وسبورتي ..

فهد لبس بلوزه سودا وبرمودا جينز وجوتي اسود وكاب اديداس .. وطلع مع اخته
دق على جود قال لها انه راح يقط شهد عندهم .. وما كان عندها مانع
طلع فهد من البيت وراح يودي اخته .. وصلها شرق .. وراح اهو المواساة


دخل واهو مستعيل وعلى طول على غرفه نور .. هالمره غير ... نوووووووووور
وينها فيه ؟؟؟ مو بالغرفه السرير فاضي .. دكتور ... نور كانت بهالغرفه وينها ؟؟

الجرء الرابع




طلع فهد من البيت وراح يودي اخته .. وصلها شرق .. وراح اهو المواساة

دخل واهو مستعيل وعلى طول على غرفه نور .. هالمره غير ... نوووووووووور
وينها فيه ؟؟؟ مو بالغرفه السرير فاضي .. دكتور ... نور كانت بهالغرفه وينها
الدكتور : والله انا مو المشرف على حالتها اسأل الدكتور حسام يمكن يكون اهوا
فهد : وينه دكتور حسام
الدكتور : والله مادري
قعد يدور يارب ساعدني .. نور عمري وينها ؟؟ لو سمحت .. انت الدكتور حسام ؟؟
دكتور حسام : أي تفضل امر ..
فهد : في مريضه اسمها نور .. نور ناصر .. انت مشرف على حالتها إهيا وامها وينها فيه ؟
الدكتور : نقلناها غرفه عاديه وطلعناها من العنايه .. حالتها تحسنت الحمدلله
فهد : صجججججججججججج .. الحمدلله تسلم دكتوووووووور تسلممممممم ..

وطار فهد على غرفه نور بعد ما خذا مكان الغرفه من الدكتور .. طق الباب .. ودخل .. شاف نور نايمه على الفراش .. ومغمضه عيونها .. رجع وصك الباب .. وبخطوات سريعه راح عند محل الزهور اللي موجود بالمستشفى وشرالها بوكيه ورد ويابه معاه ..

ورجع للغرفه .. وقف يم راس نور بهدوء ومسك ايدها وباسها .. قالها الحمدلله على السلامه يا حياتي
نور بطلت عينها شوي وحست بوجود احد يمها .. يوم افتحت عينها ما قدر فهد يمسك نفسه وعيونه بدت تدمع من الفرح ... اااااخ يا دموع الفرح اشتقت لج ..

فهد : الحمدلله على السلامه يالغاليه .. الحمدلله على السلامه يا نور عيني
نور فرحانه بس التعب واضح عليها : الله يسلمك حــ ... حياتي
فهد : عمري لا تتكلمين .. مابيج تتعبين
نور : وانا مابي اشوف هالدموع
فهد : هذي مو دموع ضعف هذي دموع فرح .. فرح بردتج يا نظر عيني ..
نور : ابتسمت مرتاحه من وجود فهد معاها ..
فهد مسك ايدها وحطها على صدره : تحسين بنبض قلبي ؟
نور : ايه
فهد :ينطق باسمج .. وينحت رسمج .. ومافي مكان لغيرج ..
نور : وتشوف اللي انت ماسك ايدها ؟
فهد : ايه ملاك شفيها ؟
نور : حياتها كلها لأجلك ..
فهد : تسلم لي هالبنت اللي احبها
نور : شلون امي حبي
فهد تذكر انه نسى يروح حق ام نور .. مع ان ام نور كانت تدري بعلاقتهم : نور والله يا عمري اسف بس نسيت اروح لها .. كنت متحطم مو عارف شسوي كنت مثل الطفل مايدري شنو يسوي
نور ضاق خلقها بس ماتقدر تلومه : حياتي اذا تقدر روح لها بعد شوي
فهد: من عيوني

ظلو مع بعض فتره لين استأذن فهد عشان يخليها ترتاح ويروح يشوف امها ..
باس ايدها ودعا لها وطلع .. وراح حق امها وتطمن عليها

فهد : good evening mam
ام نور : hello son
فهد : how r u ?
ام نور : fine thank God

كانت ام نور ما تعرف عربي وايد .. فكان فهد يكلمها بالانقليزي .. وظل فهد وياها 10 دقايق واستأذن
فهد كان مرتاح لان حبيبته استعادت عافيتها والحمدلله ..

مصعب كان بالطريج ويفكر بجود .. وغلات جود .. وقرر يقول حق اهله عنها بس يبي يتأكد من حبها له بعدين لانه ما يبي يتقدم لها وترده .. وقرر انه يكلمها لمن ترجع البيت ..

من ناحيه ثانيه ، فهد كان بالطريج ،، شوي ولا يرن تلفون اغنيه ياصاحبي دويتو عبدالمجيد وراشد الماجد ..
ولا الرقم (( عبدالمحسن )) طار فهد من الفرحه لما شاف رقم ولد عمه ..
فهد : هلااااااااااا الغالي .. هلا بالقاطع اللي ما يسأل عن ولد العمه اللي خون فينا وخلانا ندش اطفاء وانحاش وراح امريكا حق الشقر والصفر اللي مالهم داعي ..
عبدالمحسن : هلا فيك .. شدعوه شدعوه .. حرام عليك انا وين وهالصفر وين .. الصفر هذول اللي تسولف عنهم لو شافوني يخترعون .. المهم اترك عنك هالسواليف قولي شلونك ؟
فهد : بخير ياقلبي انت شلونك شمسوي ؟. ها مالك عزيمه اتيي الكويت ؟
عبدالمحسن : ان شاء الله الاسبوع الياي أيي ،، إلا اقول شلون مشعل ؟
فهد واهو ناسي : أي مشعل ؟
عبدالمحسن : مشعل اخو رفيجه الجود ..
فهد : ويييه شخباري مشعلووو من زمان مادري عنه تصدق ذكرتني فيه نسيت ابارك له عن اخته ،، ذاك اليوم جود قالت لي انخطبت مادري ملكت ..
عبدالمحسن : زيييين بالبركه يالله يستاهلون عيال بدر يستاهلون ..
فهد : المهم خلنا منهم .. يالله نبيك اتيي
عبدالمحسن يتطنز : واي حياتي مشتاقلي ؟
فهد واهو يكمل على عبدالمحسن : أي يا عمري ميت وله عليج ،، هههههه
عبدالمحسن : المهم يالاهبل انا الحين بروح .. خلص رصيدي وانت تقرق يالله باي
فهد يعني معصب : مو كفو اسولف وياك بااااااي

سكر فهد التلفون واهو يضحك على ايامه ويا محسن .. صج محسن اكثر من اخو ..وولهان عليه وايد ومو عارف اهو شلون اصلن عايش بدونه .
ودق على مشعل اخو امينه رفيجه اخته ،، وبارك له عن فاطمه ،، ومشعل من جهته عزم فهد على ملكه اخته يوم الخميس



امينه رفيجه جود عندها اخوين واخت ، مشعل وجراح و فاطمه .
مشغل 19 سنه شاب مملوح .. بس معروف عنه بشطانته
جراح 9 سنين واهو الصغير
فاطمه 25 البجر متوسطه الجمال وطيبه ورزينه
امينه 20 سنه كبر جود احلى خواتها .. شعرها كستنائي على امها وبيضه .
ابو امينه اللي اهو ( ابو مشعل) كان كبير بالسن وشوي صارم بعكس ام مشعل اللي كانت حنونه على عيالها دايما

ابو مشعل : فاطمه .. انا حددت مع ابو نايف الملكه ان شاء الله راح تكون الاسبوع الياي يوم الخميس فتجهزي
فاطمه اللي كانت ما تعصي حق ابوها امر كان ما ودها تكون الملكه بهالسرعه : يبا بس مو جنها قريبه ؟
ابو مشعل : انا قلت كلمتي .. وكلامي اعتقد لازم يمشي .
فاطمه بضيق : ان شاء الله يبا على شورك

فاطمه كانت وايد مرتاحه حق خطيبها منصور ،، وتقريبا حبته بس ماكان ودها تكون الملكه بهالسرعه .. بس بسرعه حاولت تأقلم نفسها عالموضوع ..
فاطمه : امينه .. امينه تعالي عندي لج خبر
امينه : ها ها شفيج مشتطه ؟؟ شصاير ؟
فاطمه : ابوي قالي ان الملكه الاسبوع الياي
امينه : كولوولولوولووووووش ،، الف الصلاه والسلام عليك يا حبيب الله محمد
ام مشغل : ها شصاير منو تزوج
امينه : يما سمعي الاخبار الزينه ،، ابوي يبي يخلي ملكه فطوم يوم الخميس الياي
ام مشعل ما كان ودها يتم الموضوع بهالسرعه : زين يالله على البركه يا ضناي
ضمت بنتها وباستها وقعدت تدعي لها .. شوي ولا يدخل مشغل
مشعل : قوووووة يا أطائييط (( قطاو بالمصري ))
امينه : ويييييييييه يالنا الملييييييييق
مشعل يسوي نفسه حزين : مشكوره بعد عمري .. ايي منج اكثر
امينه : الله يسلمك .. المهم يا سعاده الوزير .. اختك المخضرمه فطيم بتتزوج الاسبوع الياي . يوم الخميس
فاطمه : بل بل بل بل عليج وكاله انباء الكويت كلها درت
امينه : وااااي شتبين كيفي اختي وبفرح فيها
مشعل : زييييين عالبركه .. عشان نفتك منج قطع عله على قلوبنا
فاطمه بدلع : يما زين جذي شوفيه شيقول
ام مشعل : انت وبعدين وياك ؟؟ ما تيوووز ؟؟
مشعل : خلاص اسف يا امي الغاليه ..
يدخل جراح عليهم ..
جراح : يماا ابي شريطي السوني قولي حق مشعل يعطيني اياه
ام مشعل : اففففففف منك يامشعل تكفا بطل صدعه راس وكبر عقلك على اخوك
مشعل : روح اخذه وفكني بس .. فوق الطاوله اللي بداري

جراح راح دار مشعل ولا تلفونه كان يرن مسك الموبايل وراح عند مشعل اللي كان مع خواته وامه
جراح : مشيعل تلفونك يرن مكتوب حيــاتـ ..
نقز مشعل من مكانه وسكر حلج جراح ..
وخذا التلفون وطلع وسحب جراح وياه وعطاه شريطه السوني عشان يسكت

مشعل كان من النوع اللي كل يوم متعرف له على وحده .. وكان اسلوبه يخلي البنات يتعلقون فيه ،، ما كان مفكر بيوم انه يحب لانه قاعدته (( ماكو حب هاليومين )) !!

فبيت مصعب نواف كانت ام مصعب بالبيت وابوه طالع ..
دخل مصعب البيت سلم على امه وباس راسها
مصعب مرتبك : يما بكلمج بموضوع .. مادري اذا بتوافقين عليه ولا لأ
ام مصعب : امر ؟
مصعب : يما انا ابي اتزوج
ام مصعب والدنيا مو شايلتها من الفرحه : هذا الكلام السنع ياولدي ..تبي اشوف لك عروسه ؟
مصعب : لا يما انا اخترتها
ام مصعب واهي منصدمه : اخترتها ؟؟؟؟؟ شلون ؟
مصعب : اهيا ويانا بالكليه ومعروفه بشطارتها وادبها وجمالها .. وانا صراحه عجبتني يمه
ام مصعب واهي مرتبكه من كلام ولدها : يصير خير ان شاء الله واحنا نشوف اهل البنيه
مصعب واهو حس انه تسرع ونسا يسأل جود عن رايها : لا يما شوي أجلي السالفه ابي افكر بالموضوع شوي اكثر وابي اراقب البنت
ام مصعب : دير بالك تتهور ياولدي
مصعب : تربيتج ..
ام مصعب ابتسمت بس كانت تفكر بموضوع قاله لها ريلها عنه .. ابو مصعب كان مفكر ببنت اخوه كان يبيها حق ولده.. خافت تقول حق مصعب وينصدم ، وخصوصا انها شافت بعينه هالحماس كله عشان البنت .

مصعب صعد غرفته واهو مستانس ليش ما شاف من امه أي رفض وحس ان الطريج بينه وبين جود صار قصير ..
شوي ولا يوصل له مسج
(( مصعب .. وجودك معاي له اثر كبير ،، انسان غريب لكنه عرف يقتحم حياتي .. جود ))
مصعب استغرب من المسج وما رد لانه كان يبي يكلمها بالتلفون ، فقرر انه مايرد على مسجها عشان تشتاق ..

من صوب ثاني .. جود كانت بالسياره وراده البيت مع هديل ووضحه وشهد ،، كانت وايد منشغله بالصدف اللي جمعتها مع مصعب
اول شي الورقه وبعدين اتصاله واليوم شرق .. هل ممكن يكون هالانسان حبيبي ؟ اعوذ بالله لا يقص علي بليس هذا اكيد يلعب علي !!
هديل : لا لا لا الجود اليوووووووم مو طبيعيه !! جود شفيج ؟ شدعوه جذي
جود : والله بس شوي تعبانه من الجامعه وجذي
وضحه : هدول خلاص يبا خليها .. تقولج تعبانه .. جودي مالج شغل فيها حبيبتي سلامتج
شهد : جود تتدلع مالكم شغل . .. جود تره باجر اسراء بتيي بيتنا العصر اوكي !
جود : ماشي اصلن انا مالي شغل فيكم يعني ،، حياها الله

وقعدو البنات يسولفون مع بعض لين وصلو البيت سلمت جود وشهد على بنات عمهم ودخلو البيت ..
ولا امهم قاعده بالصاله قعدو وياها يقولون لها عن اللي صار ،،
جود صعدت دارها تبدل هدومها ولا يرن تلفونها .. (( اغرب قدر ))
جود : ألــو
مصعب : يازين الصوت يا هلا بالغاليه بجود الحب كله
جود بخجل : هلا فيك صعوبي
مصعب : فديييييييييتها .. مره ثانيه ؟؟ شنو شنو ؟؟
جود زاد الحيا وقعدت تلعب بخصلات شعرها الاسود اللي محاوطه ويهها : هههه .. ماكو شي
مصعب : حياتي احبج اموت فيج يالقمر
جود : مصعب بقولك شي .. بس مادري شلون
مصعب وقلبه يرقع : عيوني لج قولي امري تدللي
جود : انا أحـ .. أحبك
ويهه جود قلب احمر من الخجل وما عرفت شتسوي وسكرت التلفون .
مصعب قام يطامر من الفرحه وما لاحظ ان التلفون تسكر و طار حق امه

مصعب : يمااااااااااااااااااااااا ،، تكفين باجر نخطبها .. واللي يعافيج باجر ولا اذا يصير اليوم
يما احبها .. احبها
ام مصعب : قل اعوذ برب الفلق .. شنو شياطينك طلعت فجأه ؟؟؟ توك تقول افكر والحين تبيها الحين ؟؟!!
مصعب : يما ولدج قتيل بالحب ،، ولدج طاح بحب وحده عذاب .. يما تره انا احبها بس مو قايل لج .. ادري قمت اقط خيط وخيط .. بس والله احبها
ام مصعب : الحمدلله والشكر اقول فارج انت ينيت وان شاء الله من يوصل ابوك اقوله

مصعب رد داره واهو يطامر من الفرحه .. واستوعب انه جود صكت الخط .. قعد يضحك على نفسه لانه من الفرحه ماحس بنفسه ولا يدز لها مسج (( يا حبي لج يا جود .. امووووووووت فيج مو بس احبج يالدلوعه .. مستحيه هااا اوريج .. باجر لا تزوجنا انا اعلمج الحيا عالاصول ))

جود يوم قرت المسج استحت وحست الدم كله تجمع بويهها وردت عليه (( يالله عاد صعوبي لا تحرجني بكلامك .. وان شاء الله الله يقدم اللي فيه خير لنا ))

كانت جود مرتاحه وفرحانه لانه موجود بحياتها .. وحمدت ربها على وجود هالشخص وانه خوش ريال ..

بعد ايام .. تشافت نور والدكتور قدر يرخصها إهيا وامها اللي رفضت انها تطلع من المستشفى قبل بنتها ، فهد كان اول من يستقبلهم عند باب المستشفى ..

فهد : Sweety .. I miss you baby
نور : thanks يا عمري والله مادري شقولك
ام نور : thank you son for your kindness .. I don’t know what we could do without you
نور : حياتي صج كلام امي لولاك مادري شلون راح نعيش انت كل شي بدنيتي
فهد : احرجتوني بهالكلام .. بس شدعوه انتي my love واذا ما اسوي كل هذا لج حق منو اسويه
نور: thank you sweetheart
فهد واهو يخز نور: aunt I'm going to marry ur girl ..really I love her very much
ام نور : really I wish that
نور كانت تسمع ومنحرجه كلام حبيبها .. وتقول بقلبها يابختي فيك يا فهد .. احبك يا صبي احبك

فهد وصل نور وامها البيت ورد بيته ووصا ام نور على نور وقال لها انها ما تكلمه لانه خايف على راسها وخصوصا ان كان عندها نزيف.

رن تلفون فهد ولا عبدالمحسن المتصل ..
عبدالمحسن : هلااااااااااااااا يا شيخ
فهد : هلا فيك يا الغالي شلونك ؟؟؟ ها متى طيارتك
عبدالمحسن : اليوم ان شاء الله بالليل الساعه 9
فهد : اوكي ماشي يالله تنور الكويت .
عبدالمحسن : النور نورك يالغلا .. يالله طيارتنا بتطير الحين باي
فهد : بحفظ الله ، توصل بالسلامه باي


جود بالبيت تذكرت امينه ،، من زمان مو مكلمتها من يوم خبرتها عن اختها واهي ناسيه تكلمها .. قررت تتصل عليها
امينه : الووو نعم ؟؟ شتبين ؟
جود : شدعوه شدعوه؟
امينه : لا والله .. ماعرفج انا خلاص وخري والله مو كفو رفيجه
جود : شدعوه !! والله انشغلت وانتي يعني اذا انا انشغلت ما تدقين
امينه : انا لاهيه ويا اختي .. واليوم كنت بدق عليج بعزمج حق ملكه اختي عقب باجر وامي بتكلم امج عشان اتيوون وابوي لــزّم ان ابوج واخوج ايووون بعد
جود : قصدج خطيبج ؟؟
امينه : ياشينج يا اخت كرووووز
جود : هههههههههه .. يالله يالشينه بشريني عنج شلونج بعد ؟
امينه : انا بخير بسماع صوتج .
جود: احم احم ادري كناري !!
امينه : اقوووول بس !!
جود : هههه .. ياحبي لج والله وحشتيني
امينه : وانتي بعد يا الخايسه تعالي بيتنا اليوم
جود : والله مادري احتمال ماقدر ..

شهد كانت رفجتها عندها بالدار ويسولفون ..
اسراء : شهود امس رحت الفنار ولا واحد يتحرش فيني .. زفيته
شهد وعيونها طلعت بره : زفيتيه !!!!!
اسراء مستغربه : ايه زفيته بس كسر خاطري وخذيت رقمه
شهد : نعم ؟؟؟؟؟؟؟؟ رقمه ؟؟؟
اسراء : امبي انتي شفيج جذي جنج ياهل منصدم ..
شهد : أي شي ؟؟ وعادي عندج تكلمين شباب
اسراء : شدعوه انا احبهم .. بس يعني خرابيط اشغل وقتي
جربي والله عادي
شهد : لا مستحيل .. ماكو شغل اسوي جذي
اسراء : شوفي انا الحين ادق على احمدووو وسمعي كلامه شزينه

تتصل اسراء على رفيجها احمد وتسولف وياه وانواع الغزل والكلام ..
شهد : وبســـ ؟؟؟؟؟!!!!! يعني وناسه جذي ؟؟؟
اسراء : واي فديته اينن
شهد : والله الله لا يبلينا
اسراء انزين انا برد البيت الحين وهذا رقم واحد طيب ويلوق لج اذا تبين احد يهتم فيج ويحبج هذا والله يعطيج كل الحب انا الحين بروح السايق بره ينطر توه دق علي يالله بيباي
شهد وصلت اسراء لين الباب وصعدت الغرفه فوق ..
قعدت تطالع الرقم ومحتاره تتصل ولا لأ ..
قعدت تفكر بكلام اسراء وان الصبي خوش واحد ولايق عليها ..
كلام فاضي وماله داعي ،، يبا اعوذ بالله .. شلون ارضى حق نفسي هالافكار تدخل راسي .

طلعت من دارها والموضوع شاغلها ،،

الساعه 9 بمطار الكويت ..
فهد واهله وعمه جاسم ابو عبدالمحسن واهله وحمد كانو بالمطار يستقبلون عبدالمحسن .. لين شافوه من بعيد وكلهم صارو حوالينه وفرحانين فيه ويكتون عليه الورد .. فهد احتضن ولد عمه جاسم بكل قوه ،، وقال له مبروووووك ياولد العم .. مبروك يالشاطر وقعد يضحك .. وبعدها كلن رجع بيته لان الوقت تأخر وعبدالمحسن تعبان من الطياره ويبي يرتاح .. وابو فهد حلف عليهم ان يكون باجر الغدا فبيتهم عزيمه برجعه عبالدمحسن بالسلامه .

الكل رد البيت ،، شهد كانت لين الحين منشغله بسالفه الرقم اللي عطتها اياه رفيجتها وقررت انها تتصل ..
طقت الرقم وكانت متردده تطق اتصال ولا لأ ..


ابي رايكم

يووووووه عيوني تفقعت وانا اقراها

بس اشكرك عبوره على النقل الرائع
وتسلمين والقصه مررره حلووه

سجو واللي قروها تبغون اجيب باقي الاجزاء تراها خياليه